Orol dengizining qirg`og`idan yirik akulaning tishi topildi
![](/uploads/posts/2023-02/1677139357_tishi.jpg)
– Biz Orol dengizining qurigan tubidan shunga o`xshash ko`plab tish topganmiz, lekin ularning hajmi kichik edi, – deydi "Moynaq tour” sayyohlik agentligi direktori Amina Bekjanova. – Faraz qilishimizcha, ular akulaning tishi bo`lsa kerak. Lekin yangi topilgan tish eng kattasi hisoblanadi. Shu kungacha bunaqa katta tish uchramagan.
Avvalroq, Orol dengiziga turistlarni sayohatga olib chiqish bilan shug`ullanuvchi nukuslik tadbirkor Tazabay O`teuliev ham nahang baliqning tishini topgandi.
Mo`ynoqlik nuroniy baliqchilar Orol dengizi mavjud paytida unda akulalar bo`lganligini inkor qiladi.
![](http://img.uz/d/2018/07/5b408f47623e1.jpg)
Vikipediya ma`lumotlariga ko`ra, ushbu tish qadim zamonlarda yashagan akulalarning qadimiy avlodi megalodonga tegishli. Megalodon – yo`qolib ketgan akulaning bir turi. U qadimiy oligosen (33-24 million yil avval) davridan pleystosen (2 million – 10 ming yil avval) davrigacha yashagan. Megalodon akulalar o`rtasidagi eng kattasi va kuchlisi bo`lgan. Uzunligi 16 metr, salmog`i 47 tonnagacha bo`lgan. Tishlash kuchi 10,8 tonnagacha etgan. Manbalarga ko`ra, megalodonlar butun dunyo bo`ylab tarqalgan.
Toshga aylangan akula tishlari Ustyurt platosida ham ko`plab topilgan.
Ilmiy manbalar qadimda Kaspiy dengizi bilan Orol dengizi bir bo`lganligini, Ustyurt, Qoraqum, Qizilqum singari cho`llar Tetis okeanining tubi bo`lganligini tasdiqlaydi. Ustyurtda, Qizilqumda chig`anoqlarning ko`p uchrashi buning yaqqol dalilidir. Tetis okeani deyarli milliard yil oldin mavjud bo`lgan (eramizdan avvalgi 850 millioninchi yildan 5 millioninchi yilgacha).
Ustyurt, Qoraqum, Qizilqum singari cho`llar bo`lsa bundan 20-30 million yil ilgari paydo bo`lgan. Ustyurt Kaynozoy erasi o`rtalari qoldig`i bo`lib (21 million yil oldin paydo bo`lgan), ikki materikning to`qnashuvidan yuqoriga chiqib qolgan.
Demak, Orol dengizidan topilgan ushbu tishlarning yoshi millionlab yillar bilan o`lchanadi degan farazni ilgari surish mumkin.
Manba: Darakchi
Maqolani foydali yoki qiziqarli deb hisoblasangiz ijtimoiy tarmoqlardagi do`stlaringizga matnni belgilab tavsiya qiling!
Agarda Siz maqolada xatoni uchratgan bo'lsangiz, unda xato matnni belgilab, CTRL + ENTER klavishasini bosing va sayt ma'muriga xabarnoma jo'nating.