Suvning sirli xossasi
Suv — tabiatning bebaho ne’mati, bamisoli yer,
quyosh va havo singari insoniyat, hayvonot va nabotot olami tirikligining
asosiy omili. Biz uni har doim iste’mol qilamiz yoki qandaydir korimizga
ishlatamiz. Obi hayot Yer kurrasining katta qismini egallashini, sovuqda
muzlashini, issiqda gazga aylanishini yaxshi bilamiz. Shu bilan bir qatorda, u
ba’zan dahshatli tilsiz yovga aylanib, katta vayronagarchiliklar keltirib
chiqarishini yoki yuqumli kasalliklar tarqalishiga sababchi bo’lishini ham
inkor etmaymiz.
Bular sizu biz o’z ko’zimiz bilan ko’rib,
ishonch hosil qilishimiz lozim bo’lgan oddiy hodisalar. Ammo suvning yana bir
mo`jizavor xossasi borki, ko’pchiligimiz buni sezmaymiz. Aniqrog`i, u har
qanday quvvatni o’zida aks ettiruvchi axborot tashish omili ekanligini, gohida
inson hayoti uchun xavf tug`diruvchi manbaga aylanishi ham mumkinligini
xayolimizga keltirmaymiz.
Faraz qiling, qandaydir sababga ko’ra, siz
uyingizda turmush o’rtog`ingiz bilan qattiq janjallashib qoldingiz. Ana shu jarayonda ikkalangiz bir-biringizning
ustingizga ag`dargan "mag`vaza”lar biron-bir joyga izsiz yo’qolmaydi. Aksincha,
barchasi xonangiz burchaklariga cho’kadi va suvga shimiladi. Siz o’sha suvni
iste’mol qilsangiz, o’zingiz bilmagan holda undan manfiy quvvat olasiz.
Qolaversa, inson jismining to’rtdan uch qismi
suvdan iborat bo’lgani bois boyagi manfiy quvvat butun vujudingizga tarqalib,
tana a’zolaringiz hujayralariga o’rnashib oladi.
Alqissa, siz nojo’ya xatti-harakatingiz
oqibatida ruhiyatingiz, badaningiz, suyaklaringiz va boshqa a’zolaringizda
muammo ustiga muammo tug`dirasiz. Boz ustiga, manfiy quvvatga ega suv ko’p
ichilsa, odamni sal narsaga shubhalanadigan qilib qo’yadi. Badgumon kishi esa
noxush fikrlari bilan g`ayrishuuriy ravishda o’z vujudida xavfli kasalliklar
rivojlanishiga sababchi bo’ladi. Masalan, televizorda tibbiy mavzuda ko’rsatuv
berilayapti, deylik. Sershubha odam ekranda onkologik xastalikka chalingan
bemor ko’rinishi bilanoq uning o’rniga o’zini qo’ya boshlaydi va yomon
o’y-xayollar iskanjasida qoladi. Shu tariqa ongsiz ravishda jismida kasallik
urchishiga sababchi bo’ladi.
Yoki boshqa misol. Siz o’zingizni
bezovtalantirgan xastalik sabab, davo istab, shifokor huzuriga bordingiz. U
inson ruhiyatini yaxshi tushunsa, yaxshi gaplar aytib, ko’nglingizni
tinchlantiradi. Bordi-yu, sal vahimachiroq bo’lsa-chi? Yo’qdan bor yasab, bir
talay tashxis qo’yadi. O’lganning ustiga tepganday, allakimlar xuddi shunaqa
kasallikka uchragani-yu vaqtida davolanmagani tufayli azob cheka-cheka jon
taslim qilganii haqida qator dalillar keltirib, yuragingizga qutqu soladi. Qarabsizki, sizning kayfiyatingiz buziladi. Noxush
o’ylardan miyangiz g`ovlab, dardingiz battar og`irlashadi. Oxir-oqibat
sog`ayishingiz cho’zilib ketadi.
Ana, ko’rdingizmi, ortiqcha shubha-gumonlaru
noo’rin gap-so’zlar nimalarga olib keladi. Ehtimol, kimdir "Endi nima, xavfli
jihatlari ham bor ekan deb, umuman suv ichmaslik kerakmi?” deya hayratga
tushishi mumkin. Yo’q, ichish kerak! Busiz yashashning sirayam iloji yo’q.
Modomiki, shunday ekan, endi haqli savol
tug`iladi: xo’p, biron-bir tankerning halokati tufayli okean yoki dengizga
tarqalib ketgan neftni-ku, bir amallab to’plash, nogahon o’pirilib, o’zida
to’plangan zararli unsurlarni oqizib yuborgan tozalash inshootini qayta tiklash
mumkin. Turli-tuman zahri qotillar va chiqindilar bilan ifloslangan suvni,
garchi har doim ham ko’ngildagidek samara bermasa-da, qaynatish, xlorlash va
boshqa usullar bilan zararsizlantirish imkoni mavjud. Biroq odamlarning o’zi
suv orqali tarqatadigan manfiy, ya’ni xastalikka qorishgan quvvatni qanday
yo’qotsa bo’ladi?
Buning uchun, avvalo, ichishdan oldin suv
tarkibini sog`lom energiya bilan to’yintirish kerak. Lekin bu o’rinda ayrim
soxta shifokorlarning televizor orqali bir vaqtning o’zida ham suvni, ham qo’l
telefoni akkumulyatorini quvvatlantirish mumkin degan safsatalariga
zinhor-bazinhor ishonmang. Quvvatlantiruvchi "qurilma” vazifasini o’zingiz
bajaring. Sidqidildan qilingan toat-ibodat, ezgu tilaklar, shirin so’zlar va
dilrabo kuylar suvga ijobiy xususiyat bag`ishlaydigan vosita vazifasini o’tay
olishini yodda tuting. Suvni idishga solgach, u bilan obdon "suhbatlashing”.
Faqat qalbingizni qiynayotgan muammolar haqida churq etmang, chunki ular
zararli unsurlar miqdorini ko’paytirib yuboradi. Eng muhimi, siz suvdan
zavqlaning. Juda bebaho, ajoyibdan-ajoyib ne’mat ekanligini aytib, uni maqtang.
Sihat-salomatlik, farovon hayot, baxt, sevgi, Alloh, ilohiyot, tabarruklik,
muqaddaslik va boshqa ezguliklar haqida so’z yuriting.
Shunda, xoh ishoning-xoh ishonmang, mo’jiza
ro’y beradi. Iliq gaplarni "tinglagan” suv o’z tarkibini to’liq o’zgartirib,
musbat quvvatga ega bo’ladi. Bu inson salomatligi uchun o’ta muhim omil
hisoblanadi. Shuning uchun ham o’tmishda aksariyat azayimxonu tabiblar bemorlarni
aynan dam solingan, qaytariq qilingan obi hayot bilan davolaganlar. Kohinlar
ham butxonalarda o’tkaziladigan sirli ibodatlar paytida xochlardan tashqari,
tarkibi yaxshi tilaklar ila boyitilgan suvdan ham foydalanganlar.
Abdunabi Haydarov
O`zbekiston Respublikasida xizmat ko`rsatgan jurnalist
