Yuklanmoqda...

Andijon viloyati 

1989

  Maydoni 4,2 ming km.kv. Aholisi 2 million 756 ming kishidan ortiq (2013-yil 1-yanvar holati).   Shaharlar aholisi 1 million 453 ming kishidan ortiq. Qishloq aholisi 1 mln 302 ming kishidan ortiq. Andijon viloyatida 14 ta tuman, 11 ta shahar va 78 ta shaharcha mavjud.
 Andijon viloyati mamlakatning eng sharqiy viloyatidir. Ma'muriy markazi Andijon shahri. Viloyatning g'arbi qir-adirlardan iborat, sharqi tog' tizmalariga tutashgan. 
 Qishloq xo`jaligining asosiy tarmoqlari:paxtachilik, donchilik, sabzavotchilik, bog`dorchilik, uzumchilik, go`sht-sut chorvachiligi, ipakchilik.
  Sanoatning asosiy tarmoqlari: elektroenergetika, mashinasozlik, yengil sanoat, oziq-ovqat sanoati.
  Viloyat qishloq xo`jaligi rivojlangan. O'zlashtiriladigan yer deyarli qolmagan. Paxtaning yalpi hosili faqat hosildorlikni ko'tarish hisobiga oshirilmoqda. Sabzavot, kartoshka va poliz ekinlari asosan shaharlar atrofida yetishtiriladi. Qishloq xo'jaligida bog'dorchilik salmoqli o'rin tutadi. Bog' va tokzorlar faqat adirlar hisobiga kengaymoqda. Ixtisoslashgan bog'dorchilik xo'jaliklari bor. 
  Chorvachiligida qo'y va echkilarning salmog'i katta. Qoramol asosan sut va go'sht uchun boqiladi. Pillachilik viloyat xo'jaligida muhim ahamiyatga ega. 
  Viloyatda sanoat ham yuqori darajada rivojlangan bo'lib, unda 160 dan ortiq sanoat korxonalari mavjud. Korxonalar orasida Andijon avtomobil o'rindiqlari zavodi, irrigatsiya mashinasozligi zavodi, «Semurg'» trikotaj aksiyadorlik birlashmasi yirik korxonalar hisoblanadi. Korxonalar asosan Andijon sanoat tugunida joylashgan. Viloyat elektr energiyani iqtisodiy geografik rayonning birlashgan energetika tizimidan oladi. Kampirravot suv omborida quvvati 100 ming kilovattli GES qurilgan. 
  Andijon mamlakatda ilk neft olingan markazlardan biridir. Neft quvur orqali Farg'ona viloyatidagi neftni qayta ishlash zavodlariga yuboriladi. Xo'jaobodda mamlakatimizdagi eng yirik yerosti gaz ombori barpo etilgan. Undagi gazdan Andijon va Asaka shaharlariga ham yetkazib beriladi. 
  Shaharlari. Andijon obikor dehqonchilik markazida joylashgan. Neft, gaz va binokorlik materiallari konlari shaharning shundoq yonida. Shaharda og`ir, yengil hamda oziq-ovqat sanoatiga tegishli 40 taga yaqin korxona ishlab turibdi. Ulardan paxta zavodi, to`qimachilik hamda trikotaj fabrikalari mamlakat miqyosidagi yirik korxonalar hisoblanadi. Shoyi to`qish korxonalari viloyat pillakorlari tomonidan pilla bilan ta`minlab turiladi. Shaharda Andijon davlat universiteti tibbiyot, qishloq xo`jalik, mashinasozlik institutlari bor. Ko`plab teatrlar, kutubxonalar, sport maydonchalari, istirohat va botanika bog`lari mavjud. Boburiylar davrida ham Andijon xo`jaligi, ilm-ma`rifati o`z davriga nisbatan ravnaq topgan shahar bo`lgan. Bobur bu haqda "Boburnoma” asarida yozib qoldirgan. 
  Asaka mamlakatning avtomobilsozlik markazidir. Zavodda «Lacetti», «Chevrolet Epica», «Chevrolet Captiva», «Malibu»,«Kobolt»   rusumli yangi avtomashinalarni ham ishlab chiqarish yo'lga qo'yildi. Asaka shahri Shahrixonsoy daryosi oqib chiqadigan tog' etagida joylashgan. Shaharni paxta dalalari, bog'lar, tokzorlar o'rab olgan. Shahrixonsoy vodiysida neft va gaz konlari bor. Shaharda avtomobil zavodidan tashqari paxta-moy zavodlari, yengil va oziq-ovqat sanoatining boshqa korxonalari, shisha va kislorod zavodlari, binokorlik materiallari ishlab chiqaradigan korxonalar bor. Ko'pgina madaniy-ma'rifiy muassasalar ishlab turibdi. Shahar Andijon, Farg'ona va Marg'ilon yo'nalishidagi yo'llar ustida joylashgan.

plus  Foydalanilgan manbalar:

Maqolani foydali yoki qiziqarli deb hisoblasangiz ijtimoiy tarmoqlardagi do`stlaringizga matnni belgilab tavsiya qiling!
Agarda Siz maqolada xatoni uchratgan bo'lsangiz, unda xato matnni belgilab, CTRL + ENTER klavishasini bosing va sayt ma'muriga xabarnoma jo'nating.

Sharh qoldirish shakli

kodni yangilash