Andijonga borish uchun 10 ta sabab
1. Asaka "Cho'ntak” choyxonasi. Asaka shahrining
markazida joylashgan. XIX asrda bunyod etilgan. Tarixchi Avaz Muhammad
Attorning "Tarixi jahonnoma” va "Tarixi Xo'qand” asarlarida tilga olingan.
Choyxona Xudoyorxonning dala hovlisida joylashgan bo'lib, uning ichki qismida
xon supasi mavjud bo'lgan. Xushmanzara, bahavo joyda joylashgan XIX asrning
ikkinchi yarmidan buyon choyxona sifatida faoliyat yuritib kelmoqda. Bu joyning
re'lefi o'ziga xos. Eng muhimi bu erda Andijon palovini buyurma qilish mumkin.
Eng muhimi "Bo'yin go'shti” taomi bilan boshqa choyxonalardan tubdan farq
qiladi.
2. Qutayba ibn Muslim maqbarasi. Jalaquduq tumani Paxtakor
qishlog'ida joylashgan. Andijon shahridan 28 km. uzoqlikda. 715-yilda yangi
saylangan xalifa Sulaymonga bo'ysunishdan bosh tortganligi uchun isyon
ko'targan lashkarlar tomonidan o'ldirilgan arab sarkardasi Qutayba ibn Muslim
Bohiliy dafn etilgan. Tarixchi Narshaxiy uning qabri qo'yilgan qabristonni
"Mozorbuva” nomi bilan tilga olgan.
3. Bobur milliy bog'i majmuasi –
"Bog'i Bobur”. Andijon shahrining janubiy-sharqida, markazdan 6 km
uzoqlikda. 1993-yilda davlat arbobi, mohir sarkarda va ataqli shoir Zahiriddin
Muhammad Boburning 510 yilligi munosabati bilan bunyod etilgan. Bobur jamoat
fondi, Boburiylar tarixi va jaxon madaniyati muzeyi, Andijon shaharsozlik
muzeyi, observatoriya va dam olish maskanlari joylashgan. Umumiy maydoni 300 ga.
4. Asaka avtomobil zavodi - "GM-UZBEKISTAN”. Andijon shahri
markazidan 20 km uzoqlikda joylashgan. Muhtaram Yurtboshimizning tashabbusi
bilan 1996-yil 19-iyulda ochilgan. "O'zavtosanoat” uyushmasi va Koreyaning
"DAEWOO” korporatsiyasi xamkorligida qurilgan. 1996-yil 25-martdan "Damas”, iyul
oyining o'rtalaridan boshlab "Tiko” va "Neksiya” avtomobillari ishlab chiqarilgan.
Bugungi kunda zavod "GM-Uzbekistan” yopiq aktsionerlik jamiyati deb
yuritiladi. Hozirda "Neksiya”, "Matiz”, "Damas”, "Spark”, "Captiva”, "Epika”, "Lasetti” va "Malibu" kabi yengil avtomobillar ishlab chiqarilmoqda.
5. Qadim va hamisha navqiron hunarmandlar shahri - Shahrixon
pichoqchilik rastasi. Pichoqchi ustalar tomonidan tayyorlangan buyumlar hamisha
sayyohlarni o'ziga jalb etib kelgan.
6. 2011-yilda sobiq
Komil Yashin ko'chasi negizida qayta qurilgan, zamonaviy shaharsozlikning
yorqin ko'rinishlaridan biri bo'lgan- "O'zbekiston” ko`chasi. Uzunligi 1,7 km.
Andijon shahri markazida joylashgan. 2011-yil 21-mayda "Obodlik ko'ngildan
boshlanadi” festivali doirasida tantanali ravishda ochilgan.7. Alisher Navoiy nomidagi madaniyat va istirohat bog'i. 1978-yilda tashkil etilgan. Andijon viloyati Xonobod shahri Amir Temur ko'chasida
joylashgan. Andijon shahar markazidan 70 km. uzoqlikda. An'anaviy "Andijon
bahori” festivali va Soyib Xo'jaev xotirasiga bag'ishlangan kulgu va askiya
kechasi o'tkaziladigan ziyoratchilarning sevimli maskani.
8. Shirmonbuloq dam
olish maskani. Buloqboshi tumani Shirmonbuloq qishlog'ida joylashgan. Andijon
shahar markazidan 36 km. masofada joylashgan. Xushmanzara tog' tabiati va toza
havosi bilan dam oluvchilar e'tiborini qozongan. Bu tumanda RIO-2016 Olimpiada
chempioni Hasanboy Do'stmatov tug'ilgan.
9. Ulug`nor tumanida tashkil qilingan "Ribxoz” Baliq etishtirishga ixtisoslashgan xo'jaliklar umumiy maydoni 3000 ga. Bu er Sizot suvlari to'planishi natijasida xosil bo'lgan zovurlarni kengaytirilib baliqchilikka ixtisoslashgan fermer xo'jaliklari tashkil qilingan.
10. Alisher Navoiy
nomidagi madaniyat va istirohat bog'i. Andijon shahri markazida joylashgan.
1934 yilda tashkil etilgan. 1997-2000-yillarda bog' butunlay qayta qurilib,
ko'kalamzorlashtirilgan.
Burgut haykali. Andijonliklarga xos shijoat, mardlik
timsoli sifatida 1933-yili shaharlik ustalar tomonidan mehnatkashlarga sovg'a
tariqasida bunyod etilgan. Andijon yoshlari va mehmonlarning sevimli dam olish
maskani - Alisher Navoiy nomidagi madaniyat va istirohat bog'i ichida
joylashgan. 2000-yilda qayta ta'mirlangan. Unga uyg'unlashtirilib qurilgan
"Amfiteatr”da bayram tantanalari va boshqa ko'ngilochar tadbirlar o'tkaziladi.
Akbar ISAYEV
Andijon Davlat
Universiteti geografiya kafedrasi o`qituvchisi
